Fikmin #Sagagang Katineung#
Ku: Rita Rosita
Teuteupna ngabelesur, lir anak panah leupas tina jamparing, nyeceb na lulurung kalbu. Lalaunan ngadeukeutan, ceg ngaranggeum pageuh rḗma. Antarḗ naker, rḗma-rḗma kuring diantelkeun kana lambeyna. Jajantung tatalu, rḗnghap nafas ngadadak eureun, basa awak ditarik nepika antel na dadana. Samar polah, teu puguh rarasaan, sadar sotḗh karasa keusrakna kumis dina tarang.
Panon beunta, belenyḗh manḗhna imut nu matak ngirut.
“Nis…” pokna.
“Hemmm..” ukur wasa nḗmbalan kitu. Hatḗ marojḗngja teu puguh pipikiran. Hayang bacḗo tapi sakabḗh angen-angen melag na tikoro. Teu lila luk manḗhna tungkul, panangana teu leupas ngarameusan leungeun kuring.
Maksakeun nyoara, bari neuteup geugeut. Surti yḗn satemenna galindeng asih lain milik diri, sok sanajan sajatina katrḗsna na dada milik manehna. “Abdi rido, kang..” Manehna teu nḗmbalan. Rarayna alum, semu beueus. Ranggeumanana udar, sakali deui, neuteup leleb, tuluy leumpang ngajauhan, nepika lesna diteleg jalan. Panon teu lḗsot tina tonggongna nu ngajauhan nyḗsakeun sagagang katineung.***
