Fikmin # Kukupu #
Kenging: Tisna Kamisyah II
Hiberna. Katingali ukur semet muteran tangkal manalika. Duka pèdah didinya nyacakana, atawa keur nèangan batur hirupna mangsa keur hileudna kènèh meureun? Geleber… Treup, euntreup dina buah manalika nu keur sumedeng gumading. Srog, kuring nunda hanca payètan kabaya pangantèn dina mèja. Paneuteup, teleb nelek-nelek gambar ècèng kelir emas dina jangjang kiwa-tengenna nu mèbèr. “Mah, saè nya? Titip nya, Aa badè nyampeur heula rèrèncangan!” ceuk Si Jalu, bari nunda cacaka kosong nu dieusian ku kalèci dina mèja. Teu kungsi lila. Geleber… Treup! Kukupu euntreup dina cocooanana Si Jalu. “Emh, mani kuteuneung manèh tèh, Pu! Kawasna didieu meureun urut nyacakana batur manèh tèh nya? Deudeuh temenan titis-tulis tèh bet sarua jeung kuring. Sarua, kaleungitan batur hirup! ***
